蘋果公司股價最近氣氛一時無兩，噚晚（１３日）喺美國嘅股價第一次突破
５００美金大關，繼續穩坐喺全球市值一哥地位，高達４６８０億美金。另外兩大科技巨頭公谷
歌同微軟，兩間公司夾埋嘅市值都無蘋果咁勁，蘋果的確係厲害。
公司市值高，係因為賺錢賺得多；賺錢賺得多，係因為產品多人買之餘，蘋果亦畀唔少缸湖
人批評，佢地喺祖國嘅供應商靠壓榨工人令到生產成本大幅下降。可能係有關嘅聲音喺美國傳得
太廣泛，蘋果亦唔想長期背住「無良僱主」之名，剛剛公司就宣布，會將佢地最大供應商，即係
富士康（０２０３８）嘅母公司富士康集團嘅情況，交畀公平勞工協會去調查，睇下佢地係唔係
真正嘅「血汗工廠」。
咁呢個勞工協會會做啲乜？據聞佢地會調查富士康過萬名員工，主要係問下佢地喺祖國廠房
嘅工作同生活條件，包括健康、安全、薪酬、工作時長以及與管理層溝通情況等。今次蘋果將富
士康擺上檯，仲講到明富士康會好合作配合調查。蘋果同富士康今次咁順攤搞場大龍鳳，３月調
查結果公布相信都係無乜料到，最終都係繼續密密做ｉＰｈｏｎｅ，而反對人士就繼續話佢地係
「血汗工廠」。《任盈盈》