自古以來，人類就喜歡圖騰崇拜，向神像又或者係動物塑像又跪又拜，希望可以得到神靈庇佑，令自己全家平安，萬事勝意，諸如此類。不過，日本人除咗會崇拜神像之外，仲會向陽具塑像崇拜！每年四月第一個星期日，日本川崎市嘅金山神社都會人頭湧湧，所為之事當然係拜神啦！然而，佢地所拜嘅並唔係一般神明，而係陽具！
當日亦被定為「陽具祭」，除咗吸引日本人參與之外，不少歐美人士亦都慕名而來參加祭典，一齊祈求生意興隆、子孫繁盛、夫妻和睦。祭典當中，神社四處都會出現大大小小嘅特「色」商舖，專門買賣各種以陽具為形象所製成嘅產品，例如係陽具木雕，甚至係陽具糖果等等，總之當日全個神社滿眼盡是大大小小嘅棒狀物！此外，日本嘅祭典當然唔少得抬轎巡遊啦！而神轎裏面嘅亦都係巨型陽具木雕，真係霸氣十足，勁呀！